Fact Check: ಬಿಹಾರದಲ್ಲಿ ಬಿಜೆಪಿ ನಾಯಕ ಭೂ ಕಬಳಿಕೆ ನಡೆಸಿ, ಸ್ಥಳೀಯರಿಗೆ ಹಲ್ಲೆ ಮಾಡಲು ಮುಂದಾಗಿದ್ದಾನೆ ಎಂದು ಹಂಚಿಕೊಳ್ಳುತ್ತಿರುವ ವಿಡಿಯೋ ಮಧ್ಯಪ್ರದೇಶದ್ದು

2025 ರ ಕೊನೆಯಲ್ಲಿ ನಡೆಯಲಿರುವ ಬಿಹಾರ ಚುನಾವಣೆಗೆ ಈಗಿನಿಂದಲೇ ರಾಜಕೀಯ ಚಟುವಟಿಕೆಗಳು ತೀವ್ರಗೊಂಡಿರುವ ಮಧ್ಯೆ, ಬಿಹಾರದ್ದು ಎಂದು ಹೇಳಲಾದ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಈ ವಿಡಿಯೋದಲ್ಲಿ, ಜನರ ಗುಂಪು ಬಿಜೆಪಿ ನಾಯಕನ ವಿರುದ್ಧ ಭೂ ಕಬಳಿಕೆ ಆರೋಪ ಮಾಡುತ್ತಿರುವುದನ್ನು ಕಾಣಬಹುದು, ಆದರೆ ನಾಯಕ ಕಪ್ಪು ಕನ್ನಡಕ ಧರಿಸಿ ಅವರ ಮುಂದೆ ನಿಂತು ದೂರ ಹೋಗುವಂತೆ ಸೂಚನೆ ನೀಡುತ್ತಾನೆ.

ಫೇಸ್‌ಬುಕ್‌ ಬಳಕೆದಾರರು ಈ ಘಟನೆಯನ್ನು ಬಿಹಾರದಲ್ಲಿ ನಡೆದಿದೆ ಎಂದು ಹಂಚಿಕೊಳ್ಳುತ್ತಿದ್ದಾರೆ:

ನೀವು ಪೋಸ್ಟ್ ಅನ್ನು ಇಲ್ಲಿ ಪರಿಶೀಲಿಸಬಹುದು.

ಫ್ಯಾಕ್ಟ್ ಚೆಕ್

ನಾವು ಈ ಘಟನೆಯ ಕುರಿತು ಹೆಚ್ಚಿನ ಮಾಹಿತಿ ತಿಳಿಯಲು, ರಿವರ್ಸ್ ಇಮೇಜ್ ಸರ್ಚ್ ಮೂಲಕ ವಿಡಿಯೋ ಕೀಫ್ರೇಮ್‌ಗಳನ್ನು ಬಳಸಿ ಹುಡುಕಾಟ ನಡೆಸಿದಾಗ ಹಲವಾರು ವರದಿಗಳನ್ನು ಕಂಡುಕೊಂಡಿದ್ದೇವೆ. ವಿಡಿಯೋದಲ್ಲಿರುವ ವ್ಯಕ್ತಿಯನ್ನು , ಮಧ್ಯಪ್ರದೇಶದ ಸಿಂಗ್ರೌಲಿಯ ಬಿಜೆಪಿ ಕೌನ್ಸಿಲರ್ ಸೀಮಾ ಗುಪ್ತಾ ಅವರ ಪತಿ ಅರ್ಜುನ್ ದಾಸ್ ಗುಪ್ತಾ ಎಂದು ಗುರುತಿಸಲಾಗಿದೆ. ಸಿಂಗ್ರೌಲಿ ಮುನ್ಸಿಪಲ್ ಕಾರ್ಪೊರೇಷನ್ನ ವಾರ್ಡ್ 41 ರ ಗನಿಯಾರಿ ಪ್ರದೇಶದಲ್ಲಿ ಡಿಸೆಂಬರ್ 7, 2024 ರಂದು ಈ ಘಟನೆ ನಡೆದಿದೆ. ವಿವಾದಿತ ಭೂಮಿಯನ್ನು ಪಡೆಯಲು ಗುಪ್ತಾ ಸಹಚರರೊಂದಿಗೆ ಆಗಮಿಸಿದರು ಆದರೆ ಸ್ಥಳೀಯ ನಿವಾಸಿಗಳಿಂದ ಬಲವಾದ ವಿರೋಧವನ್ನು ಎದುರಿಸಬೇಕಾಯಿತು, ಇದು ವಾಗ್ವಾದ ಮತ್ತು ದೈಹಿಕ ಹಲ್ಲೆಗಳಿಗೆ ಕಾರಣವಾಯಿತು.

ಅರ್ಜುನ್ ಗುಪ್ತಾ 2012 ರಲ್ಲಿ ಕೋಮಲ್ ಗುಪ್ತಾ ಅವರಿಂದ ಖರೀದಿಸಿದ ತುಂಡು ಭೂಮಿಗೆ ಸಂಬಂಧಿಸಿದಂತೆ ವಿವಾದವಿದೆ ಎಂದು ವರದಿಗಳು ಸೂಚಿಸಿವೆ. ಕೋಮಲ್ ಅವರ ಕುಟುಂಬವು ಗಡಿ ಗೋಡೆಯ ಮೇಲಿನ ಗುಪ್ತಾ ಅವರ ಬೀಗವನ್ನು ತೆಗೆದುಹಾಕಿ ಅದನ್ನು ತಮ್ಮದೇ ಆದ ಬೀಗದಿಂದ ಬದಲಾಯಿಸಿದೆ ಎಂದು ಆರೋಪಿಸಲಾಗಿದೆ. ಗುಪ್ತಾ ಅವರು ಕುಟುಂಬದ ಸದಸ್ಯ ಸಂದೀಪ್ ಗುಪ್ತಾ ಅವರನ್ನು ಎದುರಿಸಿದಾಗ ಈ ಭಿನ್ನಾಭಿಪ್ರಾಯ ಉಲ್ಬಣಗೊಂಡಿತು. 11 ತಿಂಗಳೊಳಗೆ ಪಾವತಿಗೆ ಬದಲಾಗಿ ಭೂಮಿಯನ್ನು ನೋಂದಾಯಿಸುವ ಒಪ್ಪಂದವನ್ನು ಅರ್ಜುನ್ ಗುಪ್ತಾ ಪೂರೈಸಲಿಲ್ಲ ಎಂದು ಸಂದೀಪ್ ಹೇಳುತ್ತಾರೆ, ಮತ್ತು ಈಗ, ಭೂಮಿಯ ಮೌಲ್ಯವು ಕೋಟಿಗಳಲ್ಲಿರುವುದರಿಂದ, ಗುಪ್ತಾ ಅದನ್ನು ಬಲವಂತವಾಗಿ ವಶಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ.

ಸಂದೀಪ್ ಅವರ ಕುಟುಂಬವು ಪೊಲೀಸರಿಗೆ ದೂರು ನೀಡಿದ್ದು, ಭೂಮಿಗೆ ಒಪ್ಪಿದ ಪಾವತಿಯನ್ನು ಸ್ವೀಕರಿಸಿಲ್ಲ ಎಂದು ಆರೋಪಿಸಿದ್ದಾರೆ. ಈ ವಿಷಯವು ಬಗೆಹರಿಯದೆ ಉಳಿದಿದೆ ಮತ್ತು ಅರ್ಜುನ್ ಗುಪ್ತಾ ಆರೋಪಗಳನ್ನು ನಿರಾಕರಿಸಿದ್ದಾರೆ.

ಆದ್ದರಿಂದ, ಬಿಜೆಪಿ ನಾಯಕ ಬಿಹಾರದಲ್ಲಿ ಜನರನ್ನು ಬೆದರಿಸುತ್ತಿರುವುದನ್ನು ತೋರಿಸುತ್ತದೆ ಎಂದು ಹೇಳುವ ವೈರಲ್ ವಿಡಿಯೋ ಮಧ್ಯಪ್ರದೇಶದ್ದಾಗಿದೆ.

ಇದನ್ನು ಓದಿ: ಖಲಿಸ್ತಾನಿ ಭಯೋತ್ಪಾದಕ ಪನ್ನು ಡೊನಾಲ್ಡ್‌ ಟ್ರಂಪ್ ಪ್ರಮಾಣ ವಚನ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿದ್ದ ಎಂಬುದು ಸುಳ್ಳು