ಸಾಮಾಜಿಕ ಜಾಲತಾಣಗಳಲ್ಲಿ ಒಂದು ಸುದ್ದಿ ವ್ಯಾಪಕವಾಗಿ ಹರಡುತ್ತಿದೆ. ಇದರ ಪ್ರಕಾರ, ಅಮೆರಿಕದ ಸುಪ್ರೀಂಕೋರ್ಟ್, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ಗೆ ಸಂಬಂಧಿಸಿದಂತೆ ಆದೇಶವೊಂದನ್ನು ಹೊರಡಿಸಿದೆ ಎಂದು ಹೇಳಲಾಗಿದೆ. ಈ ಆದೇಶದಲ್ಲಿ, “ಟ್ರಂಪ್ ಅವರ ಪೂರ್ವಜರು ಅಮೆರಿಕಕ್ಕೆ ಅನಧಿಕೃತವಾಗಿ ಪ್ರವೇಶಿಸಿದ್ದರಿಂದ, ಟ್ರಂಪ್ ಕುಟುಂಬವು ದೇಶವನ್ನು ತೊರೆಯಬೇಕು ಮತ್ತು ಡೊನಾಲ್ಡ್ ಟ್ರಂಪ್ ತಕ್ಷಣವೇ ತಮ್ಮ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು” ಎಂದು ತಿಳಿಸಲಾಗಿದೆ ಎಂದು ಹಲವರು ಹಂಚಿಕೊಳ್ಳುತ್ತಿದ್ದಾರೆ.
https://www.youtube.com/shorts/t5YCtk1-vMY
ಈ ಪೋಸ್ಟ್ಗಳನ್ನು ಆಧಾರಿಸಿ ಹಲವರು ವೈರಲ್ ವಿಡಿಯೋ ಪೋಸ್ಟ್ಗಳನ್ನು ವ್ಯಾಪಕವಾಗಿ ಹಂಚಿಕೊಳ್ಳುತ್ತಿದ್ದಾರೆ. ಇದರ ಜೊತೆಗೆ ಟ್ರಂಪ್ ಅವರ ವಿರುದ್ಧ ವ್ಯಾಪಕವಾಗಿ ಆಕ್ರೋಶವನ್ನು ಹೊರಹಾಕುತ್ತಿದ್ದಾರೆ. ಹಲವರು ವೈರಲ್ ಪೋಸ್ಟ್ ಅನ್ನು ನಿಜವೆಂದು ಭಾವಿಸಿ ಅಮೆರಿಕದಲ್ಲಿ ವಲಸಿಗರನ್ನು ಹೊರ ಹಾಕುವ ಪ್ರಕ್ರಿಯೆ ಸಂಪೂರ್ಣವಾಗಿ ನಿಂತಿದೆ ಎಂದು ಬರೆದುಕೊಂಡಿದ್ದಾರೆ. ಹೀಗೆ ವಿವಿಧ ಆಯಾಮಗಳಲ್ಲಿ ಹಂಚಿಕೊಳ್ಳಲಾಗುತ್ತಿರುವ ವೈರಲ್ ಪೋಸ್ಟ್ನ ನಿಜಾಂಶ ಏನು ಎಂಬುದನ್ನು ಈ ಫ್ಯಾಕ್ಟ್ಚೆಕ್ನಲ್ಲಿ ಸಂಪೂರ್ಣವಾಗಿ ಪರಿಶೀಲನೆ ನಡೆಸೋಣ
ಫ್ಯಾಕ್ಟ್ಚೆಕ್
ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿರುವ ವೈರಲ್ ಪೋಸ್ಟ್ನ ಕುರಿತು ಸಂಪೂರ್ಣವಾಗಿ ಪರಿಶೀಲನೆ ನಡೆಸಲು ನಮ್ಮ ಕನ್ನಡ ಫ್ಯಾಕ್ಟ್ಚೆಕ್ ತಂಡ ಮುಂದಾಯಿತು. ಇದಕ್ಕಾಗಿ ನಾವು ವೈರಲ್ ಪೋಸ್ಟ್ ಅನ್ನು ಪರಿಶೀಲಿಸಲು, ಅಮೆರಿಕ ಸುಪ್ರೀಂಕೋರ್ಟ್ನ ಅಧಿಕೃತ ವೆಬ್ಸೈಟ್, ವಿಶ್ವಾಸಾರ್ಹ ಸುದ್ದಿ ಮಾಧ್ಯಮಗಳಾದ ದಿ ನ್ಯೂಯಾರ್ಕ್ ಟೈಮ್ಸ್, ವಾಷಿಂಗ್ಟನ್ ಪೋಸ್ಟ್, ಮತ್ತು ರಾಯಿಟರ್ಸ್ನಂತಹ ಮೂಲಗಳನ್ನು ಪರಿಶೀಲಿಸಲಾಯಿತು. ಇವೆಲ್ಲವೂ ಟ್ರಂಪ್ ಕುಟುಂಬವು ದೇಶ ತೊರೆಯಬೇಕೆಂದು ಅಥವಾ ಟ್ರಂಪ್ ರಾಜೀನಾಮೆ ನೀಡಬೇಕೆಂದು ಆದೇಶಿಸಿದ ಯಾವುದೇ ಸುಪ್ರೀಂಕೋರ್ಟ್ ತೀರ್ಪನ್ನು ದಾಖಲಿಸಿಲ್ಲ. ಅಲ್ಲದೆ, ಟ್ರಂಪ್ರ ಪೂರ್ವಜರ ಬಗ್ಗೆ ಅನಧಿಕೃತ ಪ್ರವೇಶದ ಆರೋಪಕ್ಕೆ ಯಾವುದೇ ಐತಿಹಾಸಿಕ ಅಥವಾ ಕಾನೂನು ಆಧಾರವಿಲ್ಲ. ಈ ಆರೋಪವು ಸಾಮಾಜಿಕ ಜಾಲತಾಣಗಳಲ್ಲಿ ಹರಡಿರುವ ತಪ್ಪು ಮಾಹಿತಿಯಾಗಿದ್ದು, ಯಾವುದೇ ವಿಶ್ವಾಸಾರ್ಹ ಮೂಲದಿಂದ ಬೆಂಬಲಿತವಾಗಿಲ್ಲ
ಡೊನಾಲ್ಡ್ ಟ್ರಂಪ್ರ ಪೂರ್ವಜರು, ವಿಶೇಷವಾಗಿ ಅವರ ತಂದೆಯ ಕುಟುಂಬ, ಜರ್ಮನಿಯಿಂದ ಕಾನೂನುಬದ್ಧವಾಗಿ ಅಮೆರಿಕಕ್ಕೆ ವಲಸೆ ಬಂದಿದ್ದರು. ಟ್ರಂಪ್ರ ತಾಯಿ ಸ್ಕಾಟ್ಲೆಂಡ್ನಿಂದ ಕಾನೂನುಬದ್ಧವಾಗಿ ವಲಸೆ ಬಂದವರು. ಇವರ ವಲಸೆಗೆ ಸಂಬಂಧಿಸಿದಂತೆ ಯಾವುದೇ ಅನಧಿಕೃತ ಚಟುವಟಿಕೆಯ ದಾಖಲೆಗಳಿಲ್ಲ. ಸುಪ್ರೀಂಕೋರ್ಟ್ನ ಇತ್ತೀಚಿನ ತೀರ್ಪುಗಳು ಟ್ರಂಪ್ನ ವಿವಾದಾತ್ಮಕ ನೀತಿಗಳಾದ ಜನ್ಮಸಿದ್ಧ ಪೌರತ್ವ ಕೊನೆಗೊಳಿಸುವಿಕೆ ಅಥವಾ ವಲಸೆ ಕಾನೂನುಗಳಿಗೆ ಸಂಬಂಧಿಸಿವೆ, ಆದರೆ ಟ್ರಂಪ್ನ ಕುಟುಂಬವನ್ನು ದೇಶದಿಂದ ಹೊರಗಟ್ಟುವ ಬಗ್ಗೆ ಯಾವುದೇ ಆದೇಶವಿಲ್ಲ.
ಒಟ್ಟಾರೆಯಾಗಿ ಹೇಳುವುದಾದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಹರಡುತ್ತಿರುವ “ಟ್ರಂಪ್ ಕುಟುಂಬವು ದೇಶ ತೊರೆಯಬೇಕು” ಎಂಬ ಸುದ್ದಿಯು ಸಂಪೂರ್ಣವಾಗಿ ಸುಳ್ಳು ಮತ್ತು ತಪ್ಪು ಮಾಹಿತಿಯಾಗಿದೆ. ಇದಕ್ಕೆ ಯಾವುದೇ ಕಾನೂನು ಅಥವಾ ಐತಿಹಾಸಿಕ ಆಧಾರವಿಲ್ಲ. ಹಾಗಾಗಿ ವೈರಲ್ ವಿಡಿಯೋ ಅಥವಾ ಪೋಸ್ಟ್ಗಳನ್ನು ಯಾವುದೇ ಕಾರಣಕ್ಕೂ ಹಂಚಿಕೊಳ್ಳಬೇಡಿ. ಸುಳ್ಳು ಸುದ್ದಿಯನ್ನು ಹಂಚಿಕೊಳ್ಳುವುದು ಕಾನೂನಿನ ಪ್ರಕಾರ ಅಪರಾಧವಾಗಿದೆ.
